រោងចក្រ​អគ្គិសនី​ធ្បូងថ្ម​តម្លៃ $១ ​ពាន់​លាន ​នឹង​សាងសង់​ក្នុង​ពេល​ឆាប់ៗ
10th December 2020, 1:50 pm

ភ្នំពេញ: ក្រុមហ៊ុន បទុមសាគរ អេនើជី ឯ.ក (Botum Sakor Energy Company Limited) ដែលជា​ក្រុមហ៊ុន​បុត្រសម្ព័ន្ធ​របស់​ក្រុមហ៊ុន​ពហុផលិតផល រ៉ូយ៉ាល់ គ្រុប ត្រូវ​បាន​ក្រុមប្រឹក្សា​អភិវឌ្ឍន៍​កម្ពុជា​ (CDC) កាលពី​ថ្ងៃ​ទី​ ៨ ខែ​ធ្នូ អនុម័ត​លើ​គម្រោង​វិនិយោគ​សាងសង់​រោងចក្រ​ផលិត​អគ្គិសនី​ដំណើរការ​ដោយ​ធ្យូងថ្ម​កម្លាំង ៧០០ មេហ្គាវ៉ាត់​ នៅ​ស្រុក​បទុមសាគរ ខេត្ត​កោះកុង​ក្នុង​តម្លៃ​វិនិយោគ ១ ​ពាន់​លាន​ដុល្លារ​។

ទោះបី​យ៉ាងណា​ក្រុមហ៊ុន រ៉ូយ៉ាល់ គ្រុប បាន​អះអាង​ថា គម្រោង​អភិវឌ្ឍន៍​រោងចក្រ​ផលិត​ថាមពល​ដើរ​ដោយ​ធ្យូងថ្ម​នេះ​ត្រូវ​ប្រើប្រាស់​ទុនវិនិយោគ​សរុប ១,៣ ​ពាន់​លាន​ដុល្លារ​។ នេះ​បើតាម​លទ្ធផល​កិច្ចប្រជុំ​រវាង​ក្រុមហ៊ុន​ជាមួយ​នឹង​ប្រជាពលរដ្ឋ​ដែល​រង​ផលប៉ះពាល់​ដីធ្លី​ចំនួន ៥៨ ​គ្រួសារ​ក្នុង​គម្រោង​អភិវឌ្ឍន៍​នេះ​កាលពី​ថ្ងៃទី ២៨ ខែ​ កក្កដា ឆ្នាំ​ ២០២០​។

ក្រុមហ៊ុន រ៉ូយ៉ាល់ គ្រុប បាន​ឱ្យ​ដឹងថា​៖ «​គម្រោង​នេះ​នឹង​ជួយ​បង្កើត​ការងារ និង​ជួយ​លើកកម្ពស់​ជីវភាព​ប្រជាពលរដ្ឋ​កម្ពុជា​ឱ្យ​កាន់តែ​មាន​ភាពល្អ​ប្រសើរ​ឡើង​»​។

យោង​តាម​អនុក្រឹត្យ​ចេញផ្សាយ​នា​ថ្ងៃទី​ ៦ ខែ​ សីហា ឆ្នាំ​ ២០២០ រដ្ឋាភិបាល​បាន​ផ្តល់​ដី​ទំហំ ១៦៨ ​ហិកតា​ ក្នុង​ឧទ្យាន​ជាតិ​បទុមសាគរ ខេត្ត​កោះកុង​ឱ្យ​ក្រុមហ៊ុន រ៉ូយ៉ាល់ គ្រុប ដើម្បី​សាងសង់​រោងចក្រ​អគ្គិសនី​ដើរ​ដោយ​ធ្យូងថ្ម​អានុភាព ៧០០ ​មេហ្គាវ៉ាត់​។

លោក សុខ សុទ្ធី អ្នកនាំពាក្យ​រដ្ឋបាល​ខេត្ត​កោះកុង​ប្រាប់​កាលពី​ថ្ងៃ​ពុធ​ថា ក្រុមហ៊ុន បទុម សាគរ អេនើជី បាននិង​កំពុង​ឈូស​ឆាយដី​ដើម្បី​រៀបចំ​ការដ្ឋាន​សាងសង់ ខណៈ​ការដោះស្រាយ​ផលប៉ះពាល់​ជាមួយ​ប្រជាពលរដ្ឋ​រស់នៅ​តំបន់​នោះ​ស្ទើរ​រួចរាល់​ហើយ​។

លោក​អះអាង​ថា​៖ «​ក្រុមហ៊ុន​បាន​ដោះស្រាយ​ជា​គោលនយោបាយ​ដល់​ប្រជាពលរដ្ឋ​ដែល​រង​ផលប៉ះពាល់​ដីធ្លី​ចំនួន ១៦៨ ​ហិកតា ​ស្ទើរតែ​រួចរាល់​ហើយ​រហូត​មក​ដល់​ពេលនេះ​។ ខ្ញុំ​គិតថា បន្ទាប់ពី​មាន​ការផ្តល់​ភ្លើង​បៃតង​ពី​ក្រុមប្រឹក្សា​អភិវឌ្ឍន៍​កម្ពុជា​ (CDC) ​គាត់​អាច​នឹង​ដំណើរការ​សាងសង់​នៅក្នុង​ពេល​ឆាប់ៗ​នេះ​»​។

លោក សុទ្ធី បាន​ឱ្យដឹង​ទៀតថា ការអភិវឌ្ឍ​រោងចក្រ​អគ្គិសនី​ដើរ​ដោយ​ធ្យូងថ្ម​នេះ​នឹង​ជួយ​បង្កើន​ប្រសិទ្ធភាព និង​សន្តិសុខ​ថាមពល​នៅក្នុង​ខេត្ត​ដែល​ជា​តំបន់​សក្តានុពល​ទេសចរណ៍​ជាប់មាត់​សមុទ្រ​មួយ​របស់​កម្ពុជា​។

លោក​ថ្លែងថា​៖ «​ខ្ញុំ​ជឿថា ការលើក​កម្ពស់​ហេដ្ឋារចនាសម្ព័ន្ធ​អគ្គិសនី​នេះ​នឹង​ជួយ​ទាក់ទាញ​ការវិនិយោគ​នានា​មក​កម្ពុជា ហើយ​វា​ក៏​នឹង​ជួយ​ជំរុញ​ការអភិវឌ្ឍ​ខេត្ត​កាន់តែ​មាន​ភាពរីកចម្រើន​យ៉ាង​ឆាប់រហ័ស​ផងដែរ​»​។

កាលពី​ខែ​មុន ក្រុមហ៊ុន បទុម សាគរ អេនើជី បាន​សម្រេច​កិច្ចសន្យា​ម៉ៅការ​វិស្វកម្ម លទ្ធកម្ម និង​សំណង់ (EPC) ​ជាមួយ​ក្រុមហ៊ុន Sinosteel Engineering & Technology នៃ​ការសាងសង់​រោងចក្រ​អគ្គិសនី​ដំណើរការ​ដោយ​ធ្យូងថ្ម​នេះ​។ នេះ​បើ​តាម​គេហទំព័រ​ព័ត៌មាន​ចិន Yicai Global​។

ក្រុមហ៊ុន​នេះ​នឹង​ទទួល​ខុសត្រូវ​លើ​ការរចនា លទ្ធកម្ម ការផ្គត់ផ្គង់​ឧបករណ៍ និង​សម្ភារ ព្រមទាំង​សេវា​សាងសង់ ដំឡើង និង​កម្រៃ​ជើងសា​។ តម្លៃ​កិច្ចសន្យា​សរុប​ប្រហែល ១,១ ​ពាន់​លាន​ដុល្លារ​។

កិច្ចសន្យា​នេះ​រួមមាន​ការសាងសង់​រោងចក្រ​អគ្គិសនី​កម្លាំង ៣៥០ ​មេហ្គាវ៉ាត់​ថ្មី​ចំនួន ២ និង​រោងចក្រ​ផលិត និង​បញ្ជូន​ថាមពល​បន្ថែម ព្រមទាំង​ស្ថានីយ​ធ្យូងថ្ម ១ ​កន្លែង​។

ការសាងសង់​នេះ​ត្រូវ​រំពឹងថា នឹង​បញ្ចប់​ក្នុង​រយៈពេល ៣៦ ​ខែ​សម្រាប់​ផ្នែក​ដំបូង និង ៤៨ ខែ​សម្រាប់​ផ្នែក​ទី ២​។ រោងចក្រ​នេះ​នឹង​ផលិត​អគ្គិសនី​នៅ​ឆ្នាំ​ ២០២៣ ឬ​ឆ្នាំ​ ២០២៤​។ នេះ​បើ​តាម​ក្រុមហ៊ុន​។

បច្ចុប្បន្ន​នេះ​ប្រភព​ថាមពល​របស់​ប្រទេស​កម្ពុជា​គ្របដណ្ដប់​ប្រហែល ៤៨ ​ភាគរយ​ពី​វារីអគ្គិសនី និង ៤៧ ភាគរយ​នៃ​រោងចក្រ​ថាមពល​ដំណើរការ​ដោយ​ធ្យូងថ្ម​។

លោក វិចទ័រ ហ្សូនា អគ្គនាយក​នៃ​អគ្គនាយកដ្ឋាន​ថាមពល​នៃ​ក្រសួង​រ៉ែ និង​ថាមពល​ធ្លាប់​ប្រាប់ថា រដ្ឋាភិបាល​ត្រូវការ​ការធ្វើ​ពិពិធកម្ម​ការផលិត​ថាមពល​អគ្គិសនី​ពី​ប្រភព​ផ្សេងៗ​ដើម្បី​ដាក់បញ្ចូល​ក្នុង​បណ្តាញ​ជាតិ ដែល​អាច​ធានា​បាន​នូវ​ការផ្គត់ផ្គង់​ថាមពល​អគ្គិសនី​ប្រកប​ដោយ​ស្ថិរភាព​នៅក្នុង​ប្រទេស​។

លោក​ថ្លែងថា​៖ «​សរុបមក យើង​ត្រូវការ​ពង្រីក​ផលបត្រ​វិនិយោគ​ផ្នែក​ថាមពល តាមរយៈ​ការដាក់បញ្ចូល​ប្រភព​ជាច្រើន​ដូចជា​វារីអគ្គិសនី ធ្យូងថ្ម និង​សូឡា ដើម្បី​ធានា​ការផ្គត់ផ្គង់​ដល់​អតិថិជន ពលរដ្ឋ ឧស្សាហកម្ម ឬ​ក្រុមហ៊ុន​ផ្ដល់​សេវា​»៕


អត្ថបទទាក់ទង